ମଦ ଦୋକାନୀଙ୍କୁ ଲାଇସେନ୍ସ ଫି ଓ ଏମ୍‌ଜିକ୍ୟୁ ଛାଡ଼

ଭୁବନେଶ୍ଵର : କରୋନା କଟକଣା ପାଇଁ ମଦ ଦୋକାନ ବନ୍ଦ ରହିଥିବାରୁ ରାଜ୍ୟ ସରକାର ଠିପି ଖୋଲା ଓ ଠିପି ବନ୍ଦ ବିଦେଶୀ ମଦ ଦୋକାନୀଙ୍କୁ ଦୁଇ ମାସର ଲାଇସେନ୍ସ ଫି ଓ ୩ ମାସର ଏମ୍‌ଜିକ୍ୟୁ (ମାସିକ ବିକ୍ରି କୋଟା) ଛାଡ଼ କରିଛନ୍ତି। ଦେଶୀ ମଦ ଦୋକାନୀଙ୍କୁ ମଧ୍ୟ ସମାନ ରିହାତି ଦିଆଯାଇଛି। ଯେଉଁମାନେ ଅଗ୍ରୀମ ଜମା କରିସାରିଛନ୍ତି ସେମାନଙ୍କୁ ଆସନ୍ତା ଆର୍ଥିକ ବର୍ଷ ନବୀକରଣ ସମୟରେ ଆଡ୍‌ଜଷ୍ଟ କରାଯିବ ବୋଲି ଅବକାରୀ ବିଭାଗ ପକ୍ଷରୁ ପ୍ରକାଶିତ ବିଜ୍ଞପ୍ତିରେ ସ୍ପଷ୍ଟ କରାଯାଇଛି। ଆଉ ଅନ୍‌ଲାଇନ୍‌ରେ ମଦ ଯୋଗାଇବା ବ୍ୟବସ୍ଥା ପୂର୍ବବତ୍‌ ଜାରି ରହିବ ବୋଲି କୁହାଯାଇଛି।

ବିଜ୍ଞପ୍ତି ଅନୁଯାୟୀ ବାକି ରହିଥିବା ବାର୍ଷିକ କୋଟାକୁ ଦୋକାନୀମାନେ ୨୦୨୦-୨୧ ଆର୍ଥିକ ବର୍ଷ ଭିତରେ ପୂରଣ କରିବେ। ଯେଉଁମାନେ ଲାଇସେନ୍ସ ନବୀକରଣ ପାଇଁ ଆବେଦନ କରିଛନ୍ତି ସେମାନଙ୍କ ଠାରୁ ମାର୍ଚ୍ଚ ମାସରେ ଲାଇସେନ୍ସ ଫି ବାବଦକୁ ଆଦାୟ ହେବାକୁ ଅଗ୍ରୀମ ଅର୍ଥ (କନ୍‌ସିଡରେସନ ମନି) ଆଜି ସୁଦ୍ଧା ଆଦାୟ ହେବ। ଏହି ଅର୍ଥ ଆଦାୟ ହୋଇନ ଥିଲେ ଲାଇସେନ୍ସ ନବୀକରଣ କରାଯିବ ନାହିଁ। ଏହି ଅଗ୍ରୀମ ଅର୍ଥ ଛଡ଼ା ଗୋଟିଏ ମାସର କନ୍‌ସିଡରେସନ ମନି ଦୋକାନୀ ସିକ୍ୟୁରିଟି ବାବଦକୁ ଜମା କରିବ। ଠିପି ଖୋଲା ବା ବିୟର ପାର୍ଲରଗୁଡ଼ିକ କନ୍‌ସିଡରେସନ ମନି ମାସିକିଆ ଜମା କରିବେ। ପୂର୍ବରୁ ଏହି ଅର୍ଥ ତିନିମାସରେ ଥରେ ଜମା ହେଉଥିଲା। ଆର୍ଥିକ ବର୍ଷରୁ ତିନିମାସ ଲାଇସେନ୍ସ ଫି ଛାଡ଼ କରାଯାଇଛି। ବାକି ରହିଥିବା ୯ ମାସର ସଲ୍‌ଭେନ୍ସି ପ୍ରମାଣପତ୍ର ପ୍ରସ୍ତୁତ କଲାବେଳେ ୧୨ ମାସର ବ୍ୟାଙ୍କ୍‌ ଗ୍ୟାରେଣ୍ଟି ଜମା କରିବାକୁ ପଡ଼ିବ। ଆସନ୍ତା ବର୍ଷ ମାର୍ଚ୍ଚ ୩୧ ତାରିଖ ପର୍ଯ୍ୟନ୍ତ ଏହି ବ୍ୟବସ୍ଥା ବଳବତ୍ତର ରହିବ ବୋଲି ବିଜ୍ଞପ୍ତିରେ ସ୍ପଷ୍ଟ କରାଯାଇଛି।

ମତାମତ ଦିଅନ୍ତୁ ।