ଯାନ୍ତ୍ରିକ ତ୍ରୁଟି, ଚନ୍ଦ୍ରଯାନ-୨ ଉତ୍‌କ୍ଷେପଣ ସ୍ଥଗିତ

ନୂଆଦିଲ୍ଲୀ: ଆନ୍ଧ୍ରପ୍ରଦେଶର ଶ୍ରୀହରିକୋଟାସ୍ଥିତ ସତୀଶ ଧାୱନ୍‌ ମହାକାଶ ଗବେଷଣା କେନ୍ଦ୍ରରୁ ମହାକାଶକୁ ଯିବ ଚନ୍ଦ୍ରଯାନ। ଭାରତର କୋଟି ଲୋକ, ଶହ ଶହ ବୈଜ୍ଞାନିକ ଓ କିଛି ଦେଶ ମଧ୍ୟ ଅପେକ୍ଷା କରି ରହିଥିଲେ ଏହି ଅଭିଯାନକୁ। କିନ୍ତୁ କୌଣସି ଯାନ୍ତ୍ରିକ ତ୍ରୁଟି କାରଣରୁ ଏହାର କାଉଣ୍ଟ ଡାଉନ୍‌ ବନ୍ଦ ରଖାଯାଇଛି। ଲଞ୍ଚ ଭେଇକିଲରେ କୌଣସି ସମସ୍ୟା ଥିବାରୁ ଉତକ୍ଷେପଣ ସ୍ଥଗିତ ରହିଛି ବୋଲି ଇସ୍ରୋ ପକ୍ଷରୁ କୁହାଯାଇଛି।

ଚନ୍ଦ୍ରଯାନ ଉତ୍‌କ୍ଷେପଣ ପାଇଁ ଆଉ ମାତ୍ର ୫୬ ମିନିଟ୍‌ ୨୪ ସେକେଣ୍ଡ ବାକିଥିଲା । ହଠାତ୍‌ ହୋଇଯାଇଥିଲା କାଉଣ୍ଟ ଡାଉନ୍‌ ବନ୍ଦ । ସୂଚନା ଅନୁଯାୟୀ ଏହା ଆଜି ଆଉ ଉତ୍‌କ୍ଷେପଣ ହୋଇପାରିବ ନାହିଁ। କେଉଁଦିନ ଉତ୍‌କ୍ଷେପଣ ହେବ ତା’ର ଚୂଡ଼ାନ୍ତ ତାରିଖ ବର୍ତ୍ତମାନ ସୁଦ୍ଧା ଜଣାପଡ଼ିନାହିଁ।

ବିଶେଷଜ୍ଞଙ୍କ କହିବା ଅନୁଯାୟୀ, ଏଥିରେ କୌଣସି ଦୁଃଖ ପ୍ରକାଶ କରିବାର ନାହିଁ। କାରଣ ତରବରରେ ତ୍ରୁଟି ସହିତ ମହାକାଶ ଯିବା ଅପେକ୍ଷା ତ୍ରୁଟିଶୂନ୍ୟ ଲଞ୍ଚିଂ ଶ୍ରେୟସ୍କର। କାରଣ ପ୍ରଥମ ଷ୍ଟେଜ୍‌ ସଲିଡ୍‌ ହୋଇଥିବାବେଳେ ଅନ୍ୟ ଷ୍ଟେଜ୍‌ଗୁଡ଼ିକ ତୁଳନାତ୍ମକ ଭାବେ ସୂକ୍ଷ୍ମ ହୋଇଥିବାରୁ ସାବଧାନ ରହିବାକୁ ପଡ଼ିବ। ପୂର୍ବରୁ ମଧ୍ୟ ଏପରି ଉତ୍‌କ୍ଷେପଣ ସ୍ଥଗିତ ରଖାଯାଇ ତ୍ରୁଟିରେ ସୁଧାର ଅଣାଯାଇଛି।

ସଚନାଯୋଗ୍ୟ ଯେ, ଗୋଟିଏ ଅର୍ବିଟର, ଗୋଟିଏ ଲ୍ୟାଣ୍ଡର (ବିକ୍ରମ) ଏବଂ ଗୋଟିଏ ରୋଭର (ପ୍ରଜ୍ଞା)କୁ ନେଇ ଗଠିତ ହୋଇଛି ଚନ୍ଦ୍ରଯାନ-୨। ଭାରତର ମହାକାଶ ଅଗ୍ରଦୂତ ବିକ୍ରମ ସରାଭାଇଙ୍କ ସ୍ମୃତିରେ ଇସ୍ରୋ ଚନ୍ଦ୍ରଯାନର ଲ୍ୟାଣ୍ଡର ନାମ ‘ବିକ୍ରମ ’ ଏବଂ ରୋଭରର ନାମ ‘ପ୍ରଜ୍ଞା’ ରଖିଛି।

ମତାମତ ଦିଅନ୍ତୁ ।