Breaking Newsରାଜ୍ୟ

୨୧୭୩ କୋଟି ଟଙ୍କାର ପ୍ରକଳ୍ପକୁ ସିଙ୍ଗଲୱିଣ୍ଡୋ ମଞ୍ଜୁରୀ

ଭୁବନେଶ୍ୱର : ରାଜ୍ୟସ୍ତରୀୟ ସିଙ୍ଗଲୱିଣ୍ଡୋ କ୍ଲିଅରାନ୍ସ ଅଥରିଟି ବୈଠକରେ ଆଜି ୨୧୭୨ କୋଟି ୯୨ଲକ୍ଷ ଟଙ୍କାର ଏହି ୪ଟି ପୁଞ୍ଜିନିବେଶ ପ୍ରସ୍ତାବକୁ ଅନୁମୋଦନ ମିଳିଛି। ଏହାଦ୍ୱାରା ୧୧୨୨ ଜଣଙ୍କୁ କର୍ମନିଯୁକ୍ତି ମିଳିବ।

ଶୁକ୍ରବାର ମୁଖ୍ୟ ସଚିବ ଅସିତ୍ କୁମାର ତ୍ରିପାଠୀଙ୍କ ଅଧ୍ୟକ୍ଷତାରେ ଡିଜିଟାଲ ପ୍ଲାଟଫର୍ମରେ ରାଜ୍ୟସ୍ତରୀୟ ସିଙ୍ଗଲୱିଣ୍ଡୋ କ୍ଲିଅରାନ୍ସ ଅଥରିଟି ବୈଠକ ଅନୁଷ୍ଠିତ ହୋଇଥିଲା। ଏଥିରେ ଶିଳ୍ପ ସଚିବ ହେମନ୍ତ ଶର୍ମା ପୁଞ୍ଜିନିବେଶ ପ୍ରସ୍ତାବ ସମ୍ପର୍କରେ ସୂଚନା ଦେବାପରେ ପ୍ରକଳ୍ପକୁ ଅନୁମୋଦନ ମିଳିଛି। ଏହି ଶିଳ୍ପାନୁଷ୍ଠାନଗୁଡ଼ିକ ପାଇଁ ଆବଶ୍ୟକ ଜମି ଓ ଜଳର ବାସ୍ତବ ଆକଳନ କରିବାକୁ ବିଭାଗ ନିର୍ଦ୍ଦେଶ ଦିଆଯାଇଛି। ଏସବୁ ପ୍ରକଳ୍ପ ଯେଭଳି ଶୀଘ୍ର କାର୍ଯ୍ୟକ୍ଷମ ହେବ ସେଥିପାଇଁ ସମସ୍ତ ସହଯୋଗ ଯୋଗାଇ ଦେବାକୁ ବିଭାଗ ଗୁଡ଼ିକୁ କୁହାଯାଇଛି।

ସିଙ୍ଗଲୱିଣ୍ଡୋ ମଞ୍ଜୁରୀ ପାଇଥିବା ୪ଟି ପ୍ରକଳ୍ପ ମଧ୍ୟରେ ରୁଙ୍ଗଟା ମାଇନ୍ସ ଲିଃର ୨ଟି, ଶ୍ୟାମ ମେଟାଲିକ୍ସର ଗୋଟିଏ ଓ ୱେଲମ୍ୟାନ୍ ଷ୍ଟିଲସ ଗ୍ୟାଙ୍ଗେୟର ଗୋଟିଏ ପ୍ରକଳ୍ପ ରହିଛି। ରୁଙ୍ଗଟା ମାଇନ୍ସ ୯୭୫କୋଟି ଟଙ୍କା ବ୍ୟୟରେ ସୁନ୍ଦରଗଡ଼ ଜିଲ୍ଲାରେ ବାର୍ଷିକ ୩୪ ମିଲିୟନ ଟନ୍ ବେନିଫିକେସନ୍ ପ୍ଲାଣ୍ଟ ସ୍ଥାପନ କରିବ। ଏଥିରେ ୨୯୦ଜଣଙ୍କ ପାଇଁ କର୍ମନିଯୁକ୍ତି ସୁଯୋଗ ସୃଷ୍ଟି ହେବ। ସେହିପରି ରୁଙ୍ଗଟା ମାଇନ୍ସ ୯୫୧କୋଟି ଟଙ୍କା ବ୍ୟୟରେ ବାର୍ଷିକ ୨୦ନିୟୁତ ଟନ୍ କ୍ଷମତାବିଶିଷ୍ଟ ଭୂତଳ ସ୍ଲରି ପାଇପ୍ ନିର୍ମାଣ କରିବ। ଏଥିରେ ୭୨ଜଣଙ୍କୁ ନିଯୁକ୍ତି ପାଇବେ।

ସେହିପରି ଶ୍ୟାମ୍ ମେଟାଲିକ୍ସ ଆଣ୍ଡ ଏନର୍ଜି ଲିଃ ସମ୍ବଲପୁରରେ ନିଜର ପେଲେଟ୍ ପ୍ଲାଂଟର କ୍ଷମତାକୁ ବାର୍ଷିକ ୦.୩ ମିଲିୟନ ଟନରୁ ୧.୨ ମିଲିୟନ ଟନକୁ ବୃଦ୍ଧି କରିବ। ଏଥପାଇଁ କମ୍ପାନୀ ୭୬.୯୨କୋଟି ଟଙ୍କା ବିନିଯୋଗ କରିବ। ୬୧୦ଜଣ ନିଯୁକ୍ତି ପାଇବେ। ସେିହପରି ୱେଲମ୍ୟାନ୍ ଷ୍ଟିଲସ ଗାଙ୍ଗେୟ ସପ୍ଲାଏ ଏଜେନ୍ସୀ ପ୍ରାଃ ଲିଃ ୧୭୦କୋଟି ଟଙ୍କା ବ୍ୟୟରେ ମୟୂରଭଞ୍ଜ ଜିଲ୍ଲାରେ ବାର୍ଷିକ ୧.୮ ମିଲିୟନ ଟନ୍ ବେନିଫିକେସନ୍ ପ୍ଲାଂଟ୍ ଓ ୧.୨ ପିଲେଟ୍ ପ୍ଲାଂଟ୍ ସ୍ଥାପନ କରିବ। ଏହାଦ୍ୱାରା ୧୫୦ଜଣ ନିଯୁକ୍ତି ପାଇବେ।

ମତାମତ ଦିଅନ୍ତୁ ।

Back to top button