Wed. Jan 29th, 2020

ବ୍ୟକ୍ତିଗତ ସମ୍ପତ୍ତିକୁ ଅନଧିକାର ପ୍ରବେଶ ଏକ ମାନବିକ ଅଧିକାର ଉଲ୍ଲଂଘନ: ସୁପ୍ରିମ୍‌ କୋର୍ଟ

ନୂଆଦିଲ୍ଲୀ : କୌଣସି ରାଜ୍ୟ ଜଣେ ବ୍ୟକ୍ତିର ବ୍ୟକ୍ତିଗତ ସମ୍ପତ୍ତିକୁ ଅନଧିକାର ପ୍ରବେଶ କରିପାରିବେନି କିମ୍ବା ବିନା ଆଇନଗତ ପ୍ରକ୍ରିୟାରେ ଏହାକୁ ନେଇ ପାର‌ି‌ବେନି। ବ୍ୟକ୍ତିଗତ ଜମିକୁ ହାସଲ କରି ପରେ ଏହାକୁ ନିଜର ବୋଲି କୌଣସି ରାଜ୍ୟ ଦାବି କରିବା ଜଣେ ବ୍ୟକ୍ତିର ମାନବିକ ଅଧିକାରକୁ ଉଲ୍ଳଂଘନ କରୁଛି। ସମ୍ବିଧାନର ଧାରା ୩୦୦ ଏ ଅଧୀନରେ ଏହା ସାମ୍ବିଧାନିକ ଅଧିକାରକୁ ମଧ୍ୟ ଉଲ୍ଲଂଘନ କରୁଛି। ଜନମଙ୍ଗଳ ରାଷ୍ଟ୍ରରେ ସମ୍ପତ୍ତି ଅଧିକାର ହେଉଛି ଏକ ମାନବିକ ଅଧିକାର। ତେଣୁ ଜଣେ ବ୍ୟକ୍ତିର ତା’ ନିଜ ସମ୍ପତ୍ତି ଉପରେ ମାଲିକାନା ରହିଛି ବୋଲି ସୁପ୍ରିମକୋର୍ଟର ବିଚାରପତି ଇନ୍ଦୁ ମାଲହୋତ୍ରା ଓ ଅଜୟ ରସ୍ତୋଗି ଗତ ଜାନୁଆରି ୮ ତାରିଖ ରାୟରେ କହିଛନ୍ତି।

ଗତ ୫୨ ବର୍ଷ ପୂର୍ବେ ବିଦ୍ୟା ଦେବୀ ନାମକ ଜଣେ ବିଧବା ମହିଳାଙ୍କ ଠାରୁ ହିମାଚଳ ପ୍ରଦେଶ ସରକାର ବଳପୂର୍ବକ ୫ ଏକର ଜମି ନେଇ ଯାଇଥିଲେ। ଏହି ଜମି ୧୯୬୭ରେ ହମିରପୁର ଜିଲ୍ଲାରେ ଏକ ରାସ୍ତା‌ ନିର୍ମାଣ କାର୍ଯ୍ୟ ପାଇଁ ସରକାର ନେଇଥିଲେ। କିନ୍ତୁ ଏନେଇ ତାଙ୍କୁ କିଛି କ୍ଷତିପୂରଣ ମିଳିନଥିଲା। ବିଦ୍ୟା ଦେବୀ ପାଠ ପଢ଼ିନଥିବାରୁ ସେ ଆଇନ କାନୁନ ବିଷୟରେ କିଛି ଜାଣିନଥିଲେ। କିନ୍ତୁ ସମ୍ପତ୍ତି ଅଧିକାର ବିଷୟରେ ବିଦ୍ୟା ଦେବୀ ୨୦୧୦‌ ମସିହାରେ ଜାଣିବାକୁ ପାଇବା ପରେ ଏନେଇ ସେ ହିମାଚଳ ପ୍ରଦେଶ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। କିନ୍ତୁ ସେଠାରେ ସେ ନିରାଶ ହେବାପରେ ସୁପ୍ରିମକୋର୍ଟଙ୍କ ଯାଇଥିଲେ। ସୁପ୍ରିମକୋର୍ଟ ଉକ୍ତ ଘଟଣାରେ ଗଭୀର ଉଦ୍‌ବେଗ ପ୍ରକାଶ କରିବା ସହ ୮୦ ବର୍ଷୀୟା ବିଦ୍ୟା ଦେବୀଙ୍କୁ ରାଜ୍ୟ ସରକାର ୧ କୋଟି କ୍ଷତିପୂରଣ ଦେବା ପାଇଁ ନିର୍ଦ୍ଦେଶ ଦେଇଛନ୍ତି।

Leave a Reply

Your email address will not be published. Required fields are marked *