ବିଧାନସଭାର ବଜେଟ ଅଧିବେଶନ ଶେଷ

ଭୁବନେଶ୍ଵର : ଓଡିଶା ବିଧାନସଭାର ବଜେଟ ଅଧିବେଶନ ଆଜି ଶେଷ ହୋଇଛି। ଗୃହକୁ ଅନିର୍ଦ୍ଦିଷ୍ଟ କାଳ ଯାଏ ମୁଲତବୀ ଘୋଷଣା କରିଛନ୍ତି ବାଚସ୍ପତି ଡ॰ ସୂର୍ଯ୍ୟ ନାରାୟଣ ପାତ୍ର।

ଫେବ୍ରୁଆରି ୧୮ ତାରିଖରେ ଆରମ୍ଭ ବିଧାନସଭା ବଜେଟ ଅଧିବେଶନର ପ୍ରଥମ ପର୍ଯ୍ୟାୟ। ୨୨ ତାରିଖରେ ୨୦୨୦-୨୧ ଆର୍ଥିକ ବର୍ଷ ପାଇଁ ବଜେଟ୍‌ ଉପସ୍ଥାପନ କରାଯାଇଥିଲା। ଫେବ୍ରୁଆରି ୨୭ରେ ପ୍ରଥମ ପର୍ଯ୍ୟାୟର ଅଧିବେଶନ ଶେଷ ହୋଇଥିଲା। ମାର୍ଚ୍ଚ ୧୨ ତାରିଖରୁ ଆରମ୍ଭ ହୋଇଥିଲା ଦ୍ଵିତୀୟ ପର୍ଯ୍ୟାୟ ଅଧିବେଶନ। ଏପ୍ରିଲ୍‌ ୯ ଯାଏ ଚାଲିବାକୁ ତାରିଖ ଧାର୍ଯ୍ୟ ହୋଇଥିଲେ ୫ଟି କାର୍ଯ୍ୟ ଦିବସ ପୂର୍ବରୁ ଗୃହକୁ ମୁଲତବୀ ଘୋଷଣା କରାଯାଇଛି।

ଦୁଇଟି ପ୍ରର୍ଯ୍ୟାୟରେ ଅଧିବେଶନରେ ସମୁଦାୟ ୨୬ଟି ବୈଠକ ବସିଛି। ରାଜ୍ୟପାଳଙ୍କ ଅଭିଭାଷଣରୁ ଆରମ୍ଭ ହୋଇଥିଲା ଅଧିବେଶନର ପ୍ରଥମ ଦିବସ। ରାଜ୍ୟପାଳଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ତିନିଦିନ ଆଲୋଚନା କରାଯାଇ ବିଚାର ଗୃହିତ ହୋଇଥିଲା। ୨୦୨୧ -୨୨ ଆର୍ଥିକ ବର୍ଷ ନିମନ୍ତେ ପୂର୍ଣ୍ଣାଙ୍ଗ ବଜେଟ ଆଗତ ଓ ବ୍ୟୟ ମଞ୍ଜୁରୀ ବିଲ ପାରିତ ହୋଇଥିଲା। ଏଥିସହ ଓଡ଼ିଶା ଲୋକୟୁକ୍ତ ସସୋଂଧନ ବିଲ, ସମିତି ପଞ୍ଜିକରଣ ସଂସୋଧନ ବିଲ, ବିଜୁ ପଟ୍ଟନାୟକ ବୈଷୟିକ ବିଶ୍ଵବିଦ୍ୟାଳୟ ସସୋଂଧନ ବିଲକୁ ମିଶାଇ ମୋଟ ୯ଟି ବିଲ ପାରିତ ହୋଇଛି। ଚାଷୀ ସମସ୍ୟା, ଦରଦାମ ବୃଦ୍ଧି, ତୈଳଦର ବୃଦ୍ଧି ପରି ବିଭିନ୍ନ ପ୍ରସଙ୍ଗରେ ମୁଲତବି ପ୍ରସ୍ତାବ ଜରିଆରେ ଆଲୋଚନା ହୋଇଥିଲା। ତେବେ ଚଳିତ ଅଧିବେଶନ କାଳରେ ମଣ୍ଡିରେ ଧାନ କିଣା ପ୍ରସଙ୍ଗକୁ ଗୃହରେ ବିରୋଧୀ ହଟ୍ଟଗୋଳ କରିବାରୁ ଗୃହରେ ଅଚଳାବସ୍ଥା ସୃଷ୍ଟି ହୋଇଥିଲା। ଶେଷଦିନ ଅର୍ଥାତ ଆଜି ବିରୋଧୀ ବିଜେପି ସଦସ୍ୟ ବାଚସ୍ପତିଙ୍କ ପୋଡିୟମ ଉପରକୁ ଚପଲ ଫିଙ୍ଗିଥିବା ଦେଖାଯାଇଥିଲା। ଏହି ଘଟଣାରେ ବାଚସ୍ପତି ବିଜେପିର ତିନିଜଣ ବିଧାୟକଙ୍କୁ ନିଲମ୍ବିତ କରିଥିଲେ।

Leave a Reply

Your email address will not be published. Required fields are marked *

Back to top button