ବାତ୍ୟା ସହାୟତା ପ୍ୟାକେଜ୍‌ : ୩୩ ପ୍ରତିଶତରୁ ଅଧିକ କ୍ଷତିଗ୍ରସ୍ତ ଚାଷୀଙ୍କୁ ଇନପୁଟ୍‌ ସବସିଡ୍

ଭୁବନେଶ୍ୱର : ବାତ୍ୟା ୟାସ୍‌ କ୍ଷତିଗ୍ରସ୍ତ ଚାଷୀଙ୍କ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସହାୟତା ପ୍ୟାକେଜ୍‌ ଘୋଷଣା କରିଛନ୍ତି। ୩୩ ପ୍ରତିଶତରୁ ଅଧିକ କ୍ଷତିଗ୍ରସ୍ତ ଚାଷୀଙ୍କ ସ୍ୱଳ୍ପ ମିଆଦୀ ଋଣ ମଧ୍ୟମ ମିଆଦୀ ହେବ। ଦୁଧିଆଳି ଗାଈ ଓ ମଇଁଷି ପାଇଁ ଚାଷୀଙ୍କୁ ମିଇବ ୩୦ ହଜାର ଟଙ୍କା।

ଗୁରୁବାର ମୁଖ୍ୟମନ୍ତ୍ରୀ କରିଥିବା ଘୋଷଣା ଅନୁଯାୟୀ ୩୩ ପ୍ରତିଶତରୁ ଅଧିକ କ୍ଷତି ସହିଥିବା କ୍ଷୁଦ୍ର/ନାମମାତ୍ର ଚାଷୀଙ୍କୁ ଇନପୁଟ୍‌ ସବସିଡ୍ ମିଳିବ। ଅଣଜଳସେଚିତ ଜମି ପାଇଁ ହେକ୍ଟର ପିଛା ସବ୍‌ସିଡି ୬୮୦୦ ଟଙ୍କା ଓ ଜଳସେଚିତ ଜମି ପାଇଁ ହେକ୍ଟରକୁ ୧୩, ୫୦୦ ଟଙ୍କା ମିଳିବ। ବାରମାସୀ ଫସଲ ଜମି ପାଇଁ ହେକ୍ଟର ପିଛା ୧୮ ହଜାର ମିଳିବ। ବାରମାସୀ ଫସଲ ପାଇଁ ଚାଷୀଙ୍କୁ ସର୍ବନିମ୍ନ ୨୦୦୦ ଟଙ୍କା ଓ ଅନ୍ୟ ଫସଲ ପାଇଁ ୧୦୦୦ ମିଳିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି।

ବାତ୍ୟା ପ୍ରଭାବିତ ଜିଲ୍ଲାର ଚାଷୀଙ୍କୁ ଏବେ ମିଳୁଥିବା ରିହାତି ସହ ୨୫ ପ୍ରତିଶତ ଅଧିକ ରିହାତି ମିଳିବ। ଧାଡ଼ି ବୁଣା କରୁଥିବା ଚାଷୀଙ୍କୁ ହେକ୍ଟର ପିଛା ମିଳିବ ୧୫୦୦ ଟଙ୍କା। କୃଷି ଯନ୍ତ୍ରପାତି କିଣିବାକୁ ପ୍ରଭାବିତ ଜିଲ୍ଲାର ଚାଷୀଙ୍କୁ ୨୦ କୋଟିର ରିହାତି ମିଳିବ। ପମ୍ପସେଟ୍‌ କିଣିବାକୁ ସର୍ବାଧିକ ୧୫୦୦୦ ପର୍ଯ୍ୟନ୍ତ ରିହାତି ମିଳିବ। ପାୱାର ସ୍ପ୍ରେୟର ପାଇଁ ୩୮୦୦, ହାତଚଲା ସ୍ପ୍ରେୟର ପାଇଁ ୭୫୦ ରିହାତି ମିଳିବ।

ଲୁଣିପାଣି ମାଡ଼ି ଯାଇଥିବା ଭଦ୍ରକ ଓ ବାଲେଶ୍ୱର ପାଇଁ ମୁଖ୍ୟମନ୍ତ୍ରୀ ସ୍ୱତନ୍ତ୍ର ସହାୟତା ଘୋଷଣା କରିଛନ୍ତି। ଜମିରୁ ଲୁଣା ହଟାଇବାକୁ ହେକ୍ଟର ପିଛା ୭୫୦ ଟଙ୍କା ମିଳିବ। ପାନ ବରଜ କରିଥିବା ୧୨୫ ଚାଷୀଙ୍କୁ ଜଣ ପିଛା ୧୫ ହଜାର ଟଙ୍କା ଦିଆଯିବ। କ୍ଷତିଗ୍ରସ୍ତ ୫୦ ଛତୁଚାଷ ୟୁନିଟକୁ ୪୦ ହଜାର ଲେଖାଏଁ ଓ ୧୧୦ ଟଙ୍କା ବିଶିଷ୍ଟ ୧୦ ହଜାର ପରିବା ମିନିକିଟ୍ ମାଗଣାରେ ଚାଷୀଙ୍କୁ ମିଳିବ। ୩୩ ପ୍ରତିଶତରୁ ଅଧିକ କ୍ଷତିଗ୍ରସ୍ତ ଚାଷୀଙ୍କ ସ୍ୱଳ୍ପ ମିଆଦୀ ଋଣ ମଧ୍ୟମ ମିଆଦୀ ହେବ।

ଦୁଧିଆଳି ଗାଈ ଓ ମଇଁଷି ପାଇଁ ୩୦ ହଜାର ଲେଖାଏଁ, ଗୋରୁ, ବଳଦଙ୍କ ପାଇଁ ୨୫ ହଜାର, ବାଛୁରୀ ପାଇଁ ୧୬ ହଜାର ମିଳିବ। ଛେଳି, ମେଣ୍ଢାଙ୍କ ପାଇଁ ୩ ହଜାର, କୁକୁଡ଼ା ଗୋଟିକୁ ୫୦ ଟଙ୍କା ମିଳିବ। ବାତ୍ୟାରେ ଭାଙ୍ଗି ଯାଇଥିବା ଗୁହାଳ ପୁନନିର୍ମାଣ ପାଇଁ ୨୧୦୦ ଟଙ୍କା ଓ ପୂରା ଭାଙ୍ଗିଥିବା ଡଙ୍କା ଲାଗି ୯୬୦୦ ଏବଂ ଆଂଶିକ ଭାଙ୍ଗି ଯାଇଥିବା ଡଙ୍ଗା ପାଇଁ ୪୧୦୦ ଟଙ୍କା ମିଳିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି।

Leave a Reply

Your email address will not be published. Required fields are marked *

Back to top button