ଏବେ ଟିକା ବିତରଣ ଉପରେ ଫୋକସ : ପ୍ରଧାନମନ୍ତ୍ରୀ

ନୂଆଦିଲ୍ଲୀ : ଦେଶରେ କରୋନା ସଂକ୍ରମଣ ହାର ହ୍ରାସ ପାଇବାରେ ଲାଗିଛି। କମୁଛି ମୃତ୍ୟୁସଂଖ୍ୟା। ଏହା ଏକ ଭଲ ସଙ୍କେତ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି।

ଶନିବାର ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଦେଶର କରୋନା ସ୍ଥିତି ଓ ଟିକା ଉତ୍ପାଦନ, ବିତରଣ ଏବଂ କରୋନା ଟିକା କେଉଁ ପର୍ଯ୍ୟାୟରେ ରହିଛି ତା ଉପରେ ଆଲୋଚନା ପାଇଁ ବୈଠକ ବସିଥିଲା। ଏଥିରେ ଲୋକଙ୍କ ପାଖରେ ଯଥାଶୀଘ୍ର କରୋନା ଟିକା ପହଞ୍ଚାଇବା ଉପରେ ଗୁରୁତ୍ୱ ଦିଆଯାଇଛି। ମୋଦି ପ୍ରସ୍ତାବ ଦେଇଛନ୍ତି ନିର୍ବାଚନ ଆୟୋଜନ କରିବା ଭଳି କରୋନା ଟିକା ବିତରଣ ପାଇଁ ସିଷ୍ଟମ ଆସିବା ଦରକାର। ସମସ୍ତ ରାଜ୍ୟ ସରକାର ଓ ସ୍ୱଂୟସହାୟକ ଗୋଷ୍ଠୀ‌କୁ ଏଥିରେ ସାମିଲ କରାଯିବା ଉଚିତ। ଭାରତରେ ୩ଟି ଟିକା ଏବେ ବିଭିନ୍ନ ପର୍ଯ୍ୟାୟରେ ରହିଛି। ଏହା ମଧ୍ୟରୁ ଗୋଟିଏ ଫେଜ-୨ରେ ଥିବା ବେଳେ ଆଉ ଗୋଟିଏ ଟିକାର ୩ୟ ପର୍ଯ୍ୟାୟ ଟ୍ରାଏଲ କରାଯାଉଛି।

ଭାରତୀୟ ବୈଜ୍ଞାନିକ ଓ ଗବେଷକମାନେ ମିଳିତ ଭାବେ ଏହା ଉପରେ କାମ କରୁଛନ୍ତି। ଆଫଗାନିସ୍ତାନ, ଭୁଟାନ, ବାଂଲାଦେଶ, ମାଳଦ୍ୱୀପ, ମରିସସ୍‌, ନେପାଳ ଓ ଶ୍ରୀଲଙ୍କାରେ ମଧ୍ୟ ଗବେଷଣା ବ୍ୟବସ୍ଥାକୁ ସୁଦୃଢ଼ କରାଯାଉଛି। ବାଂଲାଦେଶ, ମିଆଁମାର, ଭୁଟାନ ଓ କତାର ପକ୍ଷରୁ ମଧ୍ୟ ଭାରତର କରୋନା ଟିକାର କ୍ଲିନକାଲ ଟ୍ରାଏଲ ସେମାନଙ୍କ ଦେଶରେ କରିବାକୁ ଅନୁରୋଧ କରାଯାଇଛି। କେବଳ ପଡ଼ୋଶୀ ରାଷ୍ଟ୍ର ନୁହେଁ, ସମଗ୍ର ବିଶ୍ୱ ପାଇଁ ଭାରତ କରୋନା ଟିକା, ମେଡିସିନ ଓ ଟିକା ବିତରଣ ପାଇଁ ଆଇଟି ପ୍ଲାଟଫର୍ମ ପ୍ରସ୍ତୁତ ଉପରେ ଗୁରୁତ୍ୱ ଦେବାକୁ ମୋଦି କହିଛନ୍ତି।

ମତାମତ ଦିଅନ୍ତୁ ।