Mon. Dec 16th, 2019

ପୂର୍ତ୍ତ ବିଭାଗର ନୂଆ ବଦଳି ନୀତି: ଗୋଟିଏ ସ୍ଥାନ ଓ ପଦବୀରେ ୩ ବର୍ଷରୁ ଅଧିକ ରହିପାରିବେନି ଯନ୍ତ୍ରୀ

ଭୁବନେଶ୍ଵର : ମୁଖ୍ୟମନ୍ତ୍ରୀଙ୍କ ୫-ଟି ମନ୍ତ୍ର ରେ ପରିଚାଳିତ ହେବ ପୂର୍ତ୍ତ ବିଭାଗ। ଗୋଟିଏ ସ୍ଥାନ ଓ ପଦବୀରେ ତିନି ବର୍ଷରୁ ଅଧିକ ଯନ୍ତ୍ରୀ ରହିବେନି। ନିଜ ଜିଲ୍ଲା ଓ ସବଡିଭିଜନରେ ମିଳିବନି ପୋଷ୍ଟିଂ। କାର୍ଯ୍ୟକାରୀ ହେବ ନୂଆ ବଦଳି ନୀତି। ବିଭାଗରେ ସ୍ଵଚ୍ଛତା ଏବଂ କର୍ମଚାରୀଙ୍କ ଦକ୍ଷତା ବୃଦ୍ଧି ପାଇଁ ଚୁଡାନ୍ତ ନୀତି ପ୍ରସ୍ତୁତ ହେଉଥିବା ବେଳେ ଏବେ ମଧ୍ୟବର୍ତ୍ତୀକାଳିନ ବଦଳି ନୀତି ପ୍ରକାଶ ପାଇଛି।

ଏଣିକି ନୂତନ ବଦଳି ନୀତି ଆଧାରରେ ଓଡିଶା ଇଂଜିନିୟରିଂ ସର୍ଭିସ ଓ ଓଡିଶା ଡିପ୍ଲୋମା ଇଂଜିନିୟର୍ସ ସର୍ଭିସ କ୍ୟାଡର ଯନ୍ତ୍ରୀମାନଙ୍କର ବଦଳି ହେବ। ଏହି ନୀତି ଅନୁଯାୟୀ ବ୍ୟକ୍ତିଗତ ଏବଂ ପ୍ରଶାସନିକ ଆବଶ୍ୟକତା ଆଧାରରେ ବଦଳି କରାଯିବ। ପ୍ରଶାସନିକ ଆବଶ୍ୟକତାରେ ବିଭିନ୍ନ କ୍ଷେତ୍ରୀୟ କାର୍ଯ୍ୟାଳୟର ଆବଶ୍ୟକତାକୁ ସମତୁଲ କରିବାକୁ ବଦଳି କରାଯିବ। ବ୍ୟକ୍ତିଗତ ଆଧାରରେ ସ୍ବାସ୍ଥ୍ୟ କିମ୍ବା ଅନ୍ୟ କାରଣ ପାଇଁ ବଦଳି କରାଯିବ।

ସାଧାରଣ ଭାବେ ଗୋଟିଏ ସ୍ଥାନ ଓ ଗୋଟିଏ ପଦବୀରେ ତନି ବର୍ଷ କାମ କରିବା ପରେ ଇଂଜିନୟରଙ୍କ ବଦଳି ହେବ। କିନ୍ତୁ କୌଣସି ଅଧିକାରୀ ଗୋଟିଏ ସ୍ଥାନ କିମ୍ବା ପଦରେ କୌଣସି ମତେ ୫ ବର୍ଷରୁ ଅଧିକ ରହିପାରିବେ ନାହିଁ। ଓଡିଶା ଇଂଜିନିୟରଂ ସର୍ଭିସ କ୍ୟାଡର ଅଧିକାରୀମାନେ ଗୋଟିଏ ରାଜସ୍ଵ ଜିଲ୍ଲାରେ ୧୦ ବର୍ଷରୁ ଅଧିକ ରହି କାମ କରିପାରିବେ ନାହିଁ। ଓଡିଶା ଡିପ୍ଲୋମା ଇଂଜିନୟର ସର୍ଭିସ କ୍ୟାଡର ପାଇଁ ଏହି ସମୟ ସୀମା ରହିଛି ୧୫ ବର୍ଷ। ଓଡିଶା ଇଂଜିନିୟରିଂ ସର୍ଭିସ କ୍ୟାଡର ଅଫିସର ନିଜ ଜିଲ୍ଲାରେ ଏବଂ ଓଡିଶା ଡିପ୍ଲୋମା ଇଂଜନିୟର ସର୍ଭିସ କ୍ୟାଡର ଇଂଜିନିୟର ନିଜ ସବଡିଭିଜନରେ ପୋଷ୍ଟିଂ ପାଇପାରିବେ ନାହିଁ। ଅବସରକୁ ଦୁଇ ବର୍ଷ ଥିବା ଅଧିକାରୀଙ୍କ ବଦଳି କରାଯିବ ନାହିଁ। କିନ୍ତୁ ପ୍ରଶାସନିକ ଆବଶ୍ୟକତା କିମ୍ବା ସ୍ଵାସ୍ଥ୍ୟଗତ କାରଣରୁ ବଦଳି କରାଯାଇପାରିବ। ଡେପୁଟେସନରେ ଅନ୍ୟ ବିଭାଗରେ ୧୦ ବର୍ଷ ଧରି କାମ କରିଥିବା ଇଂଜିନିୟରଙ୍କୁ ସେମାନଙ୍କ ମୂଳ ବିଭାଗକୁ ଫେରାଇ ଅଣାଯିବ। ତେବେ ଏହିସବୁ ବଦଳି ନୀତି ସାଧାରଣ ଲୋକଙ୍କ ସ୍ଵାର୍ଥ କିମ୍ବା ସଂପୃକ୍ତ ଇଂଜିନୟରଙ୍କ ପରିବାର ଲୋକଙ୍କ ସ୍ଵାସ୍ଥ୍ୟଗତ ଆବଶ୍ୟକତାକୁ ଦୃଷ୍ଟିରେ ରଖି କୋହଳ କରାଯାଇପାରିବ।

ନୂତନ ବଦଳି ନୀତିର କାର୍ଯ୍ୟକାରିତା ଏବଂ ବଦଳିର ଆବଶ୍ୟକତାକୁ ବିଚାର କରିବା ପାଇଁ କେତେକ କମିଟି ଗଠନ କରାଯାଇଛି । ଏହି କମିଟିର ସୁପାରିଶ ଆଧାରରେ କର୍ତ୍ତୃପକ୍ଷ ଆବଶ୍ୟକ ନିଷ୍ପତ୍ତି ନେବେ । କାର୍ଯ୍ୟନିର୍ବାହୀ ଯନ୍ତ୍ରୀ କିମ୍ବା ତଦୁର୍ଦ୍ଧ ଶ୍ରେଣୀର ଇଂଜିନିୟରଙ୍କ ବଦଳି ସଂକ୍ରାନ୍ତ ନିଷ୍ପତ୍ତି କମିଶନର-କମ-ସଚିବଙ୍କ ଅଧ୍ୟକ୍ଷତାରେ ଗଠିତ କମିଟି ନିଷ୍ପତ୍ତି ନେବ । ଉପ-କାର୍ଯ୍ୟନିର୍ବାହୀ ଯନ୍ତ୍ରୀ ଓ ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀଙ୍କ ସଂପର୍କରେ ଅତିରିକ୍ତ ସଚିବଙ୍କ ଅଧ୍ୟକ୍ଷତାରେ ଗଠିତ କମିଟି ନିଷ୍ପତ୍ତି ନେବ । ସହକାରୀ ଯନ୍ତ୍ରୀ ଓ କନିଷ୍ଠ ଯନ୍ତ୍ରୀଙ୍କ ବଦଳି ସଂକ୍ରାନ୍ତ ନିଷ୍ପତ୍ତି ପାଇଁ ମୁଖ୍ୟଯନ୍ତ୍ରୀଙ୍କ ଅଧ୍ୟକ୍ଷତାରେ ଗଠିତ କମିଟି ଆବଶ୍ୟକ ସୁପାରିଶ କରିବ ।

Leave a Reply

Your email address will not be published. Required fields are marked *