ପିପିଲି-ଡେଲାଙ୍ଗ ସେବାରେ ଥକିବି ନାହିଁ : ଆଶ୍ରିତ

ଭୁବନେଶ୍ୱର : ହିଂସା ଓ ଭୟର ଭାବମୂର୍ତ୍ତିକୁ ବଦଳାଇ ପିପିଲି-ଡେଲାଙ୍ଗ ନିର୍ବାଚନମଣ୍ଡଳକୁ ବିକାଶର ଏକ ମଡେଲ ଭାବେ ଗଢି ତୋଳିବାକୁ ମୁଁ ବଦ୍ଧ ପରିକର। ପିପିଲିବାସୀଙ୍କ ପ୍ରତ୍ୟେକଟି ସୁଖ ଦୁଃଖରେ ଛିଡା ହୋଇ ସେମାନଙ୍କ ସମସ୍ୟାର ସମାଧାନ କରିବା ନେଇ ବିଭିନ୍ନ କାର୍ଯ୍ୟ କରିବି। ଏହି କାର୍ଯ୍ୟ କରିବାକୁ ମୁଁ ଅନ୍ୟମାନଙ୍କ ଭଳି ଠକିବି ନାହିଁ ବୋଲି ପିପିଲି ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକ ପ୍ରତିଶୃତି ଦେଇଛନ୍ତି।

ସୋମବାର ପିପିଲି ବିଜ୍ଞାପିତ ଅଂଚଳର ବିଭିନ୍ନ ୱାର୍ଡକୁ ଯାଇ ପ୍ରଚାର କରିବା ସମୟରେ ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକଙ୍କୁ ଅଂଚଳବାସୀ ବିପୁଳ ସମର୍ଥନ ଜଣାଇ ସ୍ୱାଗତ କରିଥିଲେ। ପିପିଲି-ଡେଲାଙ୍ଗ ରାଜ୍ୟର ଗୋଟିଏ ପୂରୁଣା ବିଜ୍ଞାପିତ ଅଂଚଳର ହୋଇଥିବା ସତ୍ତ୍ୱେ ବର୍ତ୍ତମାନ ସୁଦ୍ଧା ଗୋଟିଏ ସ୍ଥାୟୀ ବସଷ୍ଟାଣ୍ଡ ନିର୍ମାଣ ହୋଇ ପାରି ନାହିଁ। ଏହି ଅଂଚଳ କୃଷି ପ୍ରାଧାନ୍ୟ ଅଂଚଳ। କିନ୍ତୁ ଶୀତଳ ଭଣ୍ଡାରର ଅଭାବ, ବିଶୁଦ୍ଧ ପାନୀୟ ଜଳ ଯୋଗାଣରେ ଅବ୍ୟବସ୍ଥା ଆଜି ପ୍ରମୁଖ ସମସ୍ୟା ଭାବେ ଛିଡା ହୋଇଛି। ୩୫ ବର୍ଷ ନିରବିଚ୍ଛିନ୍ନ ଲୋକ ପ୍ରତିନିଧି ରହିଥିଲେ ଏହି ସମସ୍ୟାର ସମାଧାନ ନହେବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ଶ୍ରୀ ପଟ୍ଟନାୟକ କହିଛନ୍ତି।

ଏହି ଅବସରରେ ରାଜ୍ୟ ଉପସଭାନେତ୍ରୀ ପ୍ରଭାତି ପରିଡା, ରାଜ୍ୟ କାର୍ଯ୍ୟକାରିଣୀ ସଦସ୍ୟା ମନସ୍ମିତା ଖୁଂଟିଆ, ଓମ୍ ପ୍ରକାଶ ମିଶ୍ର, ସ୍ଥାନୀୟ ନେତୃବୃନ୍ଦ ରାମଚନ୍ଦ୍ର ମହାପାତ୍ର, ଆଲେ ଜାହିର ଖାନ୍‌, ଦେବାଶିଷ ଦିକ୍ଷିତ, ସଦାଶିବ ପରିଡା, ଜିତେନ୍ଦ୍ର ମହାରଣା, ପ୍ରଶାନ୍ତ ଦିକ୍ଷିତ ପ୍ରମୁଖଙ୍କ ସହ ଶହ ଶହ କାର୍ଯ୍ୟକର୍ତ୍ତା ସାମିଲ ଥିଲେ।

Leave a Reply

Your email address will not be published. Required fields are marked *

Back to top button