ଆଜି ନିର୍ବାଚନ ହେଲେ ବିରୋଧୀଙ୍କୁ ମିଳିବ କେତେ ଆସନ : ସର୍ଭେ ରିପୋର୍ଟ
ନୂଆଦିଲ୍ଲୀ : ୨୦୨୪ ଲୋକସଭା ନିର୍ବାଚନ ପାଇଁ ରାଜନୈତିକ ଦଳ ଗୁଡିକ ଏବେଠାରୁ ରଣନୀତି ପ୍ରସ୍ତୁତି ଆରମ୍ଭ କରିଦେଇଛନ୍ତି। ଆଗାମୀ ଲୋକସଭା ନିର୍ବାଚନ ଏନଡିଏ ଓ ଇଣ୍ଡିଆ ମଧ୍ୟରେ ସିଧାସଳଖ ଲଢେଇ ହେବ ବୋଲି ଅନୁମାନ କରାଯାଉଛି। ତେବେ କାହାକୁ କେତେ ଆସନ ମିଳିବ ତାହାର ଏକ ସର୍ଭେ ରିପୋର୍ଟ ସାମ୍ନାକୁ ଆସିଛି।
ଖବର ଅନୁଯାୟୀ ଏନଡିଏ ଓ ଇଣ୍ଡିଆକୁ ନେଇ କରାଯାଇଥିଲା ସର୍ଭେ। ଲୋକଙ୍କ ମନୋଭାବ ପରଖିବାକୁ ଇଣ୍ଡିଆ ଟିଭି ସିଏନ୍ଏକ୍ସ କରିଥିବା ସର୍ଭେରେ ଲୋକସଭାର ମୋଟ ୫୪୩ଟି ଆସନ ମଧ୍ୟରୁ ୨୬୫ଟି ଟ୍ରେଣ୍ଡ ଆସିଛି। ସେହି ଅନୁଯାୟୀ ଏନଡିଏ ୨୬୫ରୁ ୧୪୪ଟି ଆସନ ପାଇଥିବା ବେଳେ ମିଳିତ ବିରୋଧୀ ଦଳ ମଂଚ ଇଣ୍ଡିଆ ୮୫ଟି ସିଟ୍ ପାଇବ ବୋଲି ଆଶା କରାଯାଉଛି।
ଇଣ୍ଡିଆ ଟିଭି ସିଏନଏକ୍ସ ଦ୍ୱାରା କରାଯାଇଥିବା ଏହି ସର୍ଭେରେ ଦେଶର ୪୪,୫୪୮ ପ୍ରଭାବଶାଳୀ ଭୋଟରଙ୍କୁ ପଚରାଯାଇଥିବା ପ୍ରଶ୍ନ ଉପରେ ମିଳିଥିବା ମତାମତ ଅନୁଯାୟୀ ଦିଲ୍ଲୀର ସାତୋଟି ଲୋକସଭା ଆସନ ମଧ୍ୟରୁ ବିଜେପି ୫ଟି ସିଟ୍ ପାଇବ। ଯଦି ଅରବିନ୍ଦ କେଜ୍ରିୱାଲଙ୍କ ଆମ୍ ଆଦମୀ ପାର୍ଟି ଇଣ୍ଡିଆ ସହିତ ନିର୍ବାଚନରେ ପ୍ରବେଶ କରେ ତେବେ ଇଣ୍ଡିଆ ଦୁଇଟି ଆସନ ଜିତିବ ବୋଲି ଆଶା କରାଯାଉଛି।
ସେହିପରି ରାଜସ୍ଥାନର ୨୫ଟି ଲୋକସଭା ଆସନ ମଧ୍ୟରୁ ଏନଡିଏ ୨୧ଟି ଓ ଇଣ୍ଡିଆ ୪ଟି ସିଟ୍ ପାଇବ। ମଧ୍ୟପ୍ରଦେଶରେ ୨୯ଟି ଲୋକସଭା ଆସନ ମଧ୍ୟରୁ ଏନଡିଏକୁ ୨୪ଟି ଓ ଇଣ୍ଡିଆକୁ ୪ଟି ଆସନ ମିଳିପାରେ। ଛତିଶଗଡର ୧୧ଟି ସିଟ୍ ମଧ୍ୟରୁ ଏନଡିଏ ୭ ଓ ବାକି ଚାରିଟି ଇଣ୍ଡିଆ ଜିତିବ। ବିହାରରେ ୪୦ଟି ଲୋକସଭା ଆସନ ମଧ୍ୟରୁ ଏନଡିଏ ୨୪ ଓ ଇଣ୍ଡିଆ ୧୬ଟି ଆସନ ଜିତିବ ବୋଲି ସର୍ଭେରେ କୁହାଯାଇଛି। ହରିୟାଣାର ୧୦ଟି ସିଟ୍ ମଧ୍ୟରୁ ଏନଡିଏ ୮ଟି ଓ ଦୁଇଟି ସିଟ୍ ଇଣ୍ଡିଆ ପାଇବ। ଝାଡ଼ଖଣ୍ଡର ୧୪ଟି ଲୋକସଭା ଆସନ ମଧ୍ୟରୁ ଏନଡିଏ ୧୩ ଓ ଇଣ୍ଡିଆ ଗୋଟିଏ ଆସନ ପାଇପାରନ୍ତି। ହିମାଚଳ ପ୍ରଦେଶରେ କଂଗ୍ରେସ ସରକାର ସତ୍ତ୍ୱେ ଏନଡିଏ ୪ ରୁ ୩ ଓ ଇଣ୍ଡିଆ ଗୋଟିଏ ଆସନ ପାଇବ। ବର୍ତ୍ତମାନ ଉତ୍ତର ପୂର୍ବ ରାଜ୍ୟଗୁଡିକର ଲୋକସଭା ଆସନ ବିଷୟରେ କହିବାକୁ ଗଲେ ଆସାମର ୧୪ଟି ସିଟ୍ ମଧ୍ୟରୁ ଏନଡିଏ ୧୨ଟି ସିଟ୍ ପାଇବ ବୋଲି ସର୍ଭେରେ କୁହାଯାଇଛି।
