ଭିଜିଲାନ୍ସ ଜାଲରେ ଭଦ୍ରକର ପୂର୍ବତନ ଜିଲ୍ଲା ସମାଜମଙ୍ଗଳ ଅଧିକାରୀ
ଭଦ୍ରକ : ଭଦ୍ରକର ପୂର୍ବତନ ଜିଲ୍ଲା ସମାଜମଙ୍ଗଳ ଅଧିକାରୀ ଜୟନ୍ତୀ ବେହେରା ଭିଜିଲାନ୍ସ ଜାଲରେ ଫସିଛନ୍ତି। ଆୟବହିର୍ଭୂତ ସଂପତ୍ତି ଠୁଳ ଅଭିଯୋଗରେ ଭୁବନେଶ୍ୱର, ବାଲେଶ୍ଵର ଓ ଭଦ୍ରକର ୧୧ଟି ସ୍ଥାନରେ ଏକକାଳୀନ ହୋଇଛି ଚଢ଼ଉ।
ଖବର ଅନୁଯାୟୀ ଭଦ୍ରକ ଜିଲ୍ଲାରେ ଛତୁଆ ଦୁର୍ନୀତିରେ ଜିଲ୍ଲା ସମାଜମଙ୍ଗଳ ଅଧିକାରୀ ଜୟନ୍ତୀ ବେହେରା ଲିପ୍ତଥିବା ଭିଜିଲାନ୍ସ ନିକଟରେ ଅଭିଯୋଗ ଆସିଥିଲା। ସେଥିପାଇଁ ଜୟନ୍ତୀଙ୍କ ଭଦ୍ରକ ଫିରିଙ୍ଗପାଟଣା ୩ ମହଲା ବିଶିଷ୍ଟ ବାସଭବନ, ବାଲେଶ୍ୱର ସିଦ୍ଧେଶ୍ୱର କଲୋନିରେ ୩ ମହଲା ଓ ଦୁଇ ମହଲା ବିଶିଷ୍ଟ ଘର, ଭୁବନେଶ୍ୱର ଗୌତମ ନଗର ଅଞ୍ଚଳରେ ଫ୍ଲାଟ୍, ଓଲଡ ଟାଉନ ଅଞ୍ଚଳ ଫ୍ଲାଟରେ ଚଢ଼ଉ ଚାଲିଛି। କେବଳ ସେତିକି ନୁହେଁ ଜୟନ୍ତୀଙ୍କ ଭୁବନେଶ୍ଵର କାର୍ଯ୍ୟାଳୟରେ ମଧ୍ୟ ଭିଜିଲାନ୍ସ ଚଢ଼ଉ କରିଛି। ଏହାଛଡା ବାଲେଶ୍ୱର ସୁନହଟରେ ଥିବା ସମ୍ପର୍କୀୟ ଓ ଜଣେ ସହଯୋଗୀଙ୍କ ଘର ସମେତ ଭଦ୍ରକ ପୁରୁଣା ଅଫିସରେ ଚଢ଼ଉ କରାଯାଉଥିବା ଜଣାପଡିଛି।
