ଉପନିର୍ବାଚନ : ଝାଡ଼ଖଣ୍ଡରେ ଇଣ୍ଡିଆ ମେଣ୍ଟ ଓ ତ୍ରିପୁରାରେ ବିଜେପି ବିଜୟୀ
ନୂଆଦିଲ୍ଲୀ : ବିଜେପି ନେତୃତ୍ୱାଧୀନ ଏନଡିଏକୁ ଟକ୍କର ଦେବାକୁ ଲକ୍ଷ୍ୟ ରଖିଥିବା ମିଳିତ ବିରୋଧୀ ମେଣ୍ଟ ଇଣ୍ଡିଆ ପାଇଁ ଉପନିର୍ବାଚନ ଫଳାଫଳ ମିଶ୍ରିତ ହୋଇଛି। ତ୍ରିପୁରାର ଧନପୁର ଓ ବକ୍ସନଗର ବିଧାନସଭା ଆସନ ଏବଂ ଉତ୍ତରାଖଣ୍ଡର ବାଗେଶ୍ୱର ବିଧାନସଭା ଆସନ ଉପନିର୍ବାଚନରେ ବିଜେପି ବିଜୟୀ ହୋଇଛି। ଝାଡ଼ଖଣ୍ଡର ଡୁମରୀ, କେରଳର ପୁଥୁପଲ୍ଲୀ ଓ ପଶ୍ଚିମବଙ୍ଗର ଧୁଗପୁରୀରେ ବିରୋଧୀ ଦଳକୁ ମିଳିଛି ସଫଳତା।
ଖବର ଅନୁଯାୟୀ ତ୍ରିପୁରାର ବକ୍ସନଗର ଆସନରେ ବିଜେପିର ତଫଜଲ ହୋସେନ୍ ଓ ଆଦିବାସୀ ଅଧ୍ୟୁଷିତ ଧନପୁରରେ ବିନ୍ଦୁ ଦେବନାଥ ବିଜୟୀ ହୋଇଛନ୍ତି। ଉତ୍ତରାଖଣ୍ଡର ବାଗେଶ୍ୱରରେ ବିଜେପିର ପାର୍ବତୀ ଦାସ କଂଗ୍ରେସର ବସନ୍ତ କୁମାରଙ୍କୁ ୨୪୦୦ରୁ ଅଧିକ ଭୋଟରେ ପରାସ୍ତ କରଛନ୍ତି। କେରଳର ପୁଥୁପଲ୍ଲୀ ଉପନିର୍ବାଚନରେ ଶାସକ ସିପିଆଇ (ଏମ୍)କୁ ଲାଗିଛି ଝଟକା। କଂଗ୍ରେସ-ୟୁଡିଏଫ୍ ମେଣ୍ଟର ଚାଣ୍ଡି ଓମେନ୍ ୩୬ ହଜାରରୁ ଅଧିକ ଭୋଟ୍ ବ୍ୟବଧାନରେ ବିଜୟୀ ହୋଇଛନ୍ତି। ଝାଡ଼ଖଣ୍ଡର ଗିରିଡିହ ଜିଲ୍ଲାର ଡୁମରୀ ବିଧାନସଭା ଉପନିର୍ବାଚନରେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ପ୍ରାର୍ଥୀ ବେବି ଦେବୀ ଅଖିଳ ଝାଡ଼ଖଣ୍ଡ ଛାତ୍ର ସଂସଦ ଦଳର ଯଶୋଦା ଦେବୀଙ୍କୁ ୧୭,୦୦୦ରୁ ଅଧିକ ଭୋଟରେ ପରାସ୍ତ କରିଛନ୍ତି।
ସେହିପରି ସମାଜବାଦୀ ପାର୍ଟିରୁ ଇସ୍ତଫା ଦେବା ପରେ ଉତ୍ତରପ୍ରଦେଶର ଘୋସି ବିଧାନସଭା ନିର୍ବାଚନ ମଣ୍ଡଳୀର ବିଧାୟକ ତଥା ଓବିସି ନେତା ଦାରା ସିଂ ଚୌହାନ ବିଜେପିରେ ଯୋଗ ଦେଇଛନ୍ତି। ତାଙ୍କ ଇସ୍ତଫା ପରେ ସେଠାରେ ହୋଇଥିବା ଉପନିର୍ବାଚନରେ ସମାଜବାଦୀ ପାର୍ଟିର ସୁଧାକର ସିଂହ ସଦ୍ୟତମ ଟ୍ରେଣ୍ଡ ଅନୁଯାୟୀ ୨୪,୦୦୦ରୁ ଅଧିକ ଭୋଟରେ ଆଗୁଆ ଅଛନ୍ତି। ପଶ୍ଚିମବଙ୍ଗର ଧୁଗପୁରୀ ନିର୍ବାଚନ ମଣ୍ଡଳୀରେ ତୃଣମୂଳ କଂଗ୍ରେସକୁ ଟକ୍କର ଦେବା ପାଇଁ ଭାରତୀୟ ଗୋଷ୍ଠୀ କଂଗ୍ରେସ ଓ ସିପିଆଇ(ଏମ୍) ଏକାଠି ହୋଇଥିଲେ। କିନ୍ତୁ ଟିଏମସିର ନିର୍ମଳ ଚନ୍ଦ୍ର ରାୟ ବିଜୟୀ ହୋଇଛନ୍ତି।
ସୂଚନାଯୋଗ୍ୟ ଉପନିର୍ବାଚନରେ ଯେଉଁ ୭ଟି ଆସନରେ ମତଦାନ ହୋଇଥିଲା ସେଥିମଧ୍ୟରୁ ଧନପୁର, ଧୁଗପୁରୀ ଓ ବାଗେଶ୍ୱର ଆସନ ବିଜେପି ହାତରେ ଥିଲା। ଘୋସି ସମାଜବାଦୀ ପାର୍ଟି ହାତରେ ଥିବାବେଳେ ଝାଡ଼ଖଣ୍ଡର ଏହି ଆସନ ଜେଏମ୍ଏମ୍ ହାତରେ ଥିଲା। ତ୍ରିପୁରାର ବକ୍ସନଗର ଆସନ ଓ କେରଳର ପୁଥୁପଲ୍ଲୀ ଆସନ ଯଥାକ୍ରମେ ସିପିଏମ୍ ଏବଂ କଂଗ୍ରେସ ପାଖରେ ଥିଲା।
