ବିବାହ ପ୍ରସ୍ତାବ ବେଳେ ମ୍ୟାଚ ହେବ ସିକିଲ୍ ସେଲ୍ କାର୍ଡ
ଭୁବନେଶ୍ଵର : ୨୦୪୭ ସୁଦ୍ଧା ଦେଶରୁ ସିକିଲ୍ ସେଲ୍ ରୋଗର ମୂଳୋତ୍ପାଟନ ପାଇଁ କେନ୍ଦ୍ର ସରକାର ସ୍ୱତନ୍ତ୍ର ରଣନୀତି ପ୍ରସ୍ତୁତି କରିଛନ୍ତି। ସେଥିପାଇଁ ୨୫ ବର୍ଷ ବୟସ ଯାଏଁ ସମସ୍ତଙ୍କର ସିକିଲ ସେଲ ପରୀକ୍ଷା ହେବ ବୋଲି ରକ୍ତ ନିରାପତ୍ତା ନିର୍ଦ୍ଦେଶକ ଡାକ୍ତର ନୀଳକଣ୍ଠ ମିଶ୍ର କହିଛନ୍ତି।
ଖବର ଅନୁଯାୟୀ ଡାକ୍ତର ମିଶ୍ର ଗଣମାଧ୍ୟମକୁ କହିଛନ୍ତି ଏଣିକି ସିକିଲ ସେଲ କାର୍ଡ ଜାରି ହେବ। ବିବାହ ପ୍ରସ୍ତାବ ବେଳେ ଏହି କାର୍ଡ ମ୍ୟାଚ କରାଯିବା ପାଇଁ ପରାମର୍ଶ ଦିଆଯିବ। ଯେଉଁମାନଙ୍କର ସିକିଲ୍ ସେଲ ଥିବ, ସେମାନଙ୍କୁ ଅନ୍ୟ ସିକିଲ୍ ସେଲ ପଜିଟିଭ ଥିବା ବ୍ୟକ୍ତିଙ୍କୁ ବିବାହ ନକରିବାକୁ କୁହାଯିବ। ଫଳରେ ପରବର୍ତ୍ତୀ ପୀଢ଼ିଙ୍କୁ ସିକିଲ ସେଲ୍ ମୁକ୍ତ ରଖାଯାଇପାରିବ। ସେ କହିଲେ ରାଜ୍ୟର ପଶ୍ଚିମ ଓ ଦକ୍ଷିଣାଞ୍ଚଳର ୨୦ ଜିଲ୍ଲାରେ ଏହି କାର୍ଯ୍ୟକ୍ରମ ଲାଗି କେନ୍ଦ୍ର ସୁପାରିଶ କରିଥିବା ବେଳେ ରାଜ୍ୟରେ ଏହାକୁ ସବୁ ଜିଲ୍ଲାରେ କାର୍ଯ୍ୟକାରୀ ପାଇଁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ଏବେ ଟେଷ୍ଟିଂ କିଟ୍ ଓ କାର୍ଡ କିଣା ପାଇଁ ଟେଣ୍ଡର ସରିଛି। ଟେଷ୍ଟିଂ କିଟ୍ ଓ କାର୍ଡ ଆସିବା ପରେ ଅଙ୍ଗନୱାଡ଼ି କେନ୍ଦ୍ର, ସ୍କୁଲ ଓ କଲେଜରେ କ୍ୟାମ୍ପ କରି ସିକିଲ ସେଲ ପରୀକ୍ଷା କରାଯିବ। ଚଳିତ ବର୍ଷ ରାଜ୍ୟରେ ୧୫ରୁ ୨୦ ଲକ୍ଷ ଲୋକଙ୍କର ସିକିଲ ସେଲ୍ ପରୀକ୍ଷା କରିବା ପାଇଁ ଲକ୍ଷ୍ୟ ରଖାଯାଇଥିବା ଡାକ୍ତର ମିଶ୍ର ସୂଚନା ଦେଇଛନ୍ତି।
