କଶ୍ମୀର ଭାରତର ଅବିଚ୍ଛେଦ୍ୟ ଅଙ୍ଗ: ଜାମିଆତ ଉଲେମା-ଇ-ହିନ୍ଦ

ନୂଆଦିଲ୍ଲୀ: ମୁସଲିମ ଧର୍ମର ବଡ଼ ଅନୁଷ୍ଠାନ ଜାମିଆତ ଉଲେମା-ଇ-ହିନ୍ଦ ଆଜି ପାକିସ୍ତାନ ବିରୋଧରେ ପ୍ରସ୍ତାବ ପାରିତ କରିଛି। ଏଥିରେ ଦର୍ଶାଯାଇଛି ଜମ୍ମୁ-କଶ୍ମୀର ଭାରତର ଅଭିନ୍ନ ଅଙ୍ଗ। ଭାରତର ଆଭ୍ୟନ୍ତରୀଣ ଅଂଶର ଯେଉଁଭଳି ବିକାଶ ହେଉଛି ଉପତ୍ୟକାରେ ମଧ୍ୟ ସେହିପରି ବିକାଶ ହେବ।

ଗୁରୁବାର ସଂଗଠନ ବାର୍ଷିକ ସମ୍ମିଳନୀରେ କୁହାଯାଇଛି ଯେ ବିଦ୍ରୋହୀ ଫୋର୍ସ ଓ ପଡ଼ୋଶୀ ରାଷ୍ଟ୍ର କଶ୍ମୀରକୁ ଧ୍ୱଂସ କରିବାକୁ ଚେଷ୍ଟା କରୁଛନ୍ତି। ସେମାନେ ଏଠାକାର ଲୋକଙ୍କୁ ଢାଲ ଭାବେ ବ୍ୟବହାର କରୁଥିବା ବେଳେ ବିଚ୍ଛିନ୍ନତାବାଦୀମାନେ କଶ୍ମୀରରେ ରହି ଲୋକମାନଙ୍କୁ ହିଂସା ସୃଷ୍ଟି କରିବାକୁ ପ୍ରବର୍ତ୍ତାଉଛନ୍ତି। ଏଭଳି କାଣ୍ଡକୁ ଜାମିଆତ ଉଲେମା-ଇ-ହିନ୍ଦ କେବେ ହେଲେ ସମର୍ଥନ କରେନାହିଁ।

ବିଚ୍ଛନ୍ନତାବାଦୀଙ୍କ ଏହି ଆଭିମୁଖ୍ୟ କେବଳ ଭାରତକୁ ନୁହେଁ ସମଗ୍ର କଶ୍ମୀରବାସୀଙ୍କ କ୍ଷତି କରୁଛି। ଆମେ କଶ୍ମୀରର ବିକାଶ କଥା ଚିନ୍ତା କରିବା ପୂର୍ବରୁ ପ୍ରଥମେ ସେମାନଙ୍କ ଇଚ୍ଛା ଓ ସଂସ୍କୃତି କଥା ମଧ୍ୟ ବିଚାର କରିବାକୁ ପଡ଼ିବ। କଶ୍ମୀରର ବିକାଶ ଭାରତ ସହ ଅଙ୍ଗାଅଙ୍ଗି ଭାବେ ଜଡ଼ିତ। ପାକିସ୍ତାନ ମୁସଲିମମାନେ ଭାରତ ବିରୋଧୀ ବୋଲି ଅନ୍ତର୍ଜାତୀୟ ସ୍ତରରେ ଦେଖାଇବାକୁ ଚାହୁଁଛି। ଆମେ ପାକିସ୍ତାନର ଏଭଳି ଆଚରଣକୁ କଡ଼ା ନିନ୍ଦା କରୁଛୁ।”

ଆହୁରି କୁହାଯାଇଛି ଜମ୍ମୁ-କଶ୍ମୀରରେ ସବୁକିଛି ସ୍ୱାଭାବିକ କରିବାକୁ ସରକାର ତୁରନ୍ତ ପଦକ୍ଷେପ ନେବା ଦରକାର। ଜମ୍ମୁ-କଶ୍ମୀରବାସୀଙ୍କ ସାମ୍ବିଧାନିକ ଅଧିକାରକୁ କ୍ଷୁଣ୍ଣ କରାଯିବା ଠିକ୍ ନୁହେଁ। ସଂଗଠନ ପକ୍ଷରୁ କେନ୍ଦ୍ର ସରକାର ଜମ୍ମୁ-କଶ୍ମୀର ଧାରା ୩୭୦ ଉଚ୍ଛେଦ କରାଯିବା ନିଷ୍ପତ୍ତିକୁ ମଧ୍ୟ ସମର୍ଥନ କରାଯାଇଛି।

ମତାମତ ଦିଅନ୍ତୁ ।