ଅର୍ଣ୍ଣବ ଗୋସ୍ଵାମୀଙ୍କ ଜାମିନ ଆବେଦନର ଶୁଣାଣି ଶୁକ୍ରବାର

ମୁମ୍ବାଇ : ବରିଷ୍ଠ ସାମ୍ବାଦିକ ତଥା ରିପବ୍ଲିକ ଟିଭିର ମୁଖ୍ୟ-ସଂପାଦକ ଅର୍ଣ୍ଣବ ଗୋସ୍ଵାମୀଙ୍କୁ ବୁଧବାର ମୁମ୍ବାଇ ପୁଲିସ ଗିରଫ କରିଥିଲା। ତାଙ୍କ ଜାମିନ ଆବେଦନର ଶୁଣାଣିକୁ ବମ୍ବେ ହାଇକୋର୍ଟ ଗୋଟିଏ ଦିନ ଘୁଞ୍ଚାଇ ଦେଇଛନ୍ତି।

ଗୁରୁବାର ଅର୍ଣ୍ଣବଙ୍କ ପକ୍ଷରୁ ଗିରଫଦାରୀକୁ ଚ୍ୟାଲେଞ୍ଜ କରି କରାଯାଇଥିବା ‘ହେବି୍ଅସ୍ କର୍ପସ୍’ ମାମଲା ଓ ଜାମିନ ଆବେଦନ ହାଇକୋର୍ଟଙ୍କ ଏକ ଡିଭିଜନ ବେଞ୍ଚରେ ହୋଇଥିଲା। ମାତ୍ର ବେଞ୍ଚ ଏହି ମାମଲାରେ ଆତ୍ମହତ୍ୟା କରିଥିବା ମୁମ୍ବାଇର ଇଣ୍ଟେରିଅର ଡିଜାଇନର ଅନଭୟ ନାଏକଙ୍କ ବିଧବା ପତ୍ନୀଙ୍କୁ ପକ୍ଷଭୁକ୍ତ କରିବା ସହ ତାଙ୍କ ମତାମତ ଜାଣିବା ଲାଗି ଆସନ୍ତାକାଲି ୩ଟା ବେଳେ ଶୁଣାଣି କରିବାକୁ କହିଛନ୍ତି।

ଉଲ୍ଲେଖଯୋଗ୍ୟ ୨୦୧୮ ମସିହାରେ ଅନଭୟ ନାଏକ ଓ ତାଙ୍କ ମା’ଙ୍କୁ ଆତ୍ମହତ୍ୟା କରିବାକୁ ଉସକାଇବା ଅଭିଯୋଗରେ ଅର୍ଣ୍ଣବ ଓ ଅନ୍ୟ ୨ ଜଣଙ୍କୁ ଗିରଫ କରାଯାଇଛି। ଗୋସ୍ୱାମୀଙ୍କୁ ବୁଧବାର ସକାଳେ ଆଲିବାଗ ପୋଲିସ ଗିରଫ କରି ଆଲିବାଗରେ ଚିଫ୍ ଜୁଡିସିଆଲ୍ ମାଜିଷ୍ଟ୍ରେଟଙ୍କ ପାଖରେ ହାଜର କରାଇ ନଭେମ୍ବର ୧୮ ପର୍ଯ୍ୟନ୍ତ ବିଚାର ବିଭାଗୀୟ ହେପାଜତକୁ ନେଇଥିଲା। ପ୍ରଥମେ ମାଜିଷ୍ଟ୍ରେଟଙ୍କ ନିକଟରେ ଜାମିନ ଆବେଦନ କରିଥିବା ଅର୍ଣ୍ଣବ ଗୁରୁବାର ଦିନ ତାଙ୍କ ଜାମିନ ଆବେଦନ ପ୍ରତ୍ୟାହାର କରି ତୁରନ୍ତ ହାଇକୋର୍ଟରେ ଆବେଦନ କରି ତାଙ୍କର ଗିରଫଦାରୀ ସଂପୂର୍ଣ୍ଣ ବେଆଇନ ବୋଲି ଦର୍ଶାଇଥିଲେ।

ଅର୍ଣ୍ଣବଙ୍କ ଓକିଲ ବରିଷ୍ଠ ଆଡଭୋକେଟ୍ ଆବାଦ୍ ପୋଣ୍ଡା ପକ୍ଷ ରଖି କହିଥିଲେ ଏହି ମାମଲା ୨୦୧୮ରେ ଏକ ଅଦାଲତଙ୍କ ଆଦେଶରେ ବନ୍ଦ ହୋଇଯାଇଥିଲା। କୋର୍ଟଙ୍କ ଆଦେଶ ବିନା ଏହାର ପୁନଃଅନୁସନ୍ଧାନ ଆରମ୍ଭ କରିବା ଆଇନ ଅନୁସାରେ ଗ୍ରହଣୀୟ ନୁହେଁ। ଏଥିଲାଗି ଅଦାଲତଙ୍କ ଅନୁମତି ଜରୁରୀ। ସୁପ୍ରିମକୋର୍ଟଙ୍କ ଏକ ରାୟକୁ ଦର୍ଶାଇ ସେ ଯୁକ୍ତି ରଖିଥିଲେ “ମୃତ ମାମଲା”ରେ ଗୋସ୍ୱାମୀଙ୍କୁ ଗିରଫ କରିବା ସମ୍ପୂର୍ଣ୍ଣ ବେଆଇନ। ରିପବ୍ଲିକ୍ ମୁଖ୍ୟ ସମ୍ପାଦକଙ୍କୁ ତୁରନ୍ତ ମୁକ୍ତ କରିବାକୁ ପୋଣ୍ଡା କୋର୍ଟଙ୍କୁ ଅନୁରୋଧ କରିଥିଲେ। ଏହି ମାମଲାରେ ହାଇକୋର୍ଟଙ୍କର ପୂର୍ଣ୍ଣ କ୍ଷମତା ରହିଥିବାରୁ ରାଜ୍ୟ ସରକାରଙ୍କ ଦ୍ୱାରା ଅନ୍ୟାୟର ଶିକାର ହୋଇଥିବା ନାଗରିକଙ୍କୁ ନ୍ୟାୟ ଦେବାକୁ ସେ ପ୍ରାର୍ଥନା କରିଥିଲେ।

ମାତ୍ର ଜଷ୍ଟିସ୍ ଏସ୍ ଏସ୍ ସିନ୍ଦେ ଓ ଜଷ୍ଟିସ୍ ଏମ୍.ଏସ୍. କର୍ନିକଙ୍କୁ ନେଇ ଗଠିତ ଖଣ୍ଡପୀଠ ତୁରନ୍ତ ଜାମିନ ଦେବାକୁ ମନା କରିବା ସହ ଆତ୍ମହତ୍ୟା କରିଥିବା ଅନଭୟ ନାଏକଙ୍କ ପତ୍ନୀଙ୍କୁ ପକ୍ଷଭୁକ୍ତ କରିଥିଲେ। ତାଙ୍କର ମତ ଶୁଣିବା ପରେ ମାମଲାର ରାୟ ଦିଆଯିବ ବୋଲି ଖଣ୍ଡପୀଠ ମତ ରଖିଥିଲେ। ତେବେ ଆସନ୍ତାକାଲି ଦୀପାବଳୀ ଛୁଟିର ଶେଷ କାର୍ଯ୍ୟ ଦିବସ କୋର୍ଟ କଣ ରାୟ ସୁନାଉଛନ୍ତି ତାହା ଶୁକ୍ରବାର ଜଣାପଡିବ।

ମତାମତ ଦିଅନ୍ତୁ ।