ଦୁଇ ଜଣ ବ୍ୟକ୍ତିଙ୍କ ୱାଶିଂ ମେଶିନରେ ସମସ୍ତେ ସଫା ହୋଇଯାଉଛନ୍ତି : ମମତା

ନୂଆଦିଲ୍ଲୀ : ପଶ୍ଚିମବଙ୍ଗରେ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ଶାସକ ଟିଏମସି ଏବଂ ବିଜେପି ପ୍ରଚାରକୁ ଜୋରଦାର କରିଛନ୍ତି। ଗୁରୁବାର ମୁଖ୍ୟମନ୍ତ୍ରୀ ମମତା ବାନାର୍ଜୀ ଏକ କାର୍ଯ୍ୟକ୍ରମରେ ଯୋଗଦେବା ଅବସରରେ କେନ୍ଦ୍ର ସରକାର ଏବଂ ବିଜେପି ଉପରେ ପ୍ରବଳ ବର୍ଷିଛନ୍ତି। ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହ ମନ୍ତ୍ରୀ ଅମିତ ଶାହଙ୍କ ନାମ ନ ନେଇ ଦିଦି କହିଛନ୍ତି, କେବଳ ଦୁଇ ଜଣ ବ୍ୟକ୍ତି ଦେଶକୁ ଚଳାଉଛନ୍ତି। ସେମାନଙ୍କ ୱାଶିଂ ମେଶିନରେ ସବୁ କଳା ଲୋକ ସଫା ହୋଇଯାଉଛନ୍ତି। କେବଳ ଏତିକି ନୁହେଁ, ଦେଶରେ ପରିବାରବାଦ ରାଜନୀତି ଉପରେ ବି ମୁହଁ ଖୋଲିଛନ୍ତି।

କାର୍ଯ୍ୟକ୍ରମରେ ଦିଦି କହିଥିଲେ, ପରସ୍ପର ମଧ୍ୟରେ ଲଢ଼େଇ କରାଇବା ହେଉଛି ବିଜେପିର କାମ। ମୁଁ ଜଣେ ଷ୍ଟ୍ରିଟ୍‌ ଫାଇଟର। କାହାକୁ ଡରେ ନାହିଁ। ଏମାନେ ପଶ୍ଚିମବଙ୍ଗ ଆସି ଆମକୁ ଡରାଉଛନ୍ତି। ଯଦି ଆମେ ଡରିବୁ ତେବେ ମରିବୁ, ସେଥିପାଇଁ ଡରିବାର ନାହିଁ। କେବଳ ଦୁଇ ଜଣ ବ୍ୟକ୍ତି ଦେଶ ଚଳାଉଛନ୍ତି। ସେମାନେ କହୁଛନ୍ତି, ଯେଉଁମାନେ ଆମ କଥା ନ ମାନିବେ, ସେମାନଙ୍କୁ ଶେଷ କରିଦେବୁ। ମମତା ଆହୁରି କହିଥିଲେ ଯେ, ଏହି ଲୋକମାନେ ଆଟିଟ୍ୟୁଡ୍‌ ଦେଖାଉଛନ୍ତି ଏବଂ ଆମେ ଆଟିଟ୍ୟୁଡ୍‌କୁ ଗ୍ରାଟିଟ୍ୟୁଡ୍‌ରେ ବଦଳାଉ। ଏମାନଙ୍କ ଭୟ ଏତେ ଅଧିକ ଯେ ସମସ୍ତେ ଭୟଭୀତ ରହୁଛନ୍ତି। ଦେଶର ଉଦ୍ୟୋଗପତି ବି ଭୟଭୀତ ଅଛନ୍ତି।

Leave a Reply

Your email address will not be published. Required fields are marked *

Back to top button